Gabaygaan Qiimaha leh waxaa noo curisay Ruqiyo Maxamed Subagdhame oo joogta magaalada London kana mid ah howl wadeenada Noor foundation ee UK. Waxaan filayaa wiil iyo gabar iyo macalin iyo howl wadeenba inay dareemayaan dareenka Ruqiyo halkan ku cabirayso aana rajeynayo in qof kasta oo naga mida uu howsha halkaas kasii wado.
Guul iyo horumar.
Gabayga waakan ee ka bogo:
Derejaale wiilkii
moddo diiftu haysee
deegaan mugdiya iyo
darayada ku jirayoow
mar hadii dadkaagii
ka damqaday xanuunkoo
dugsiyadi laguu furay
aan kula dardaarmee
waa daw iftiin loo
diihaalka gaajiyo
cudurada dilaagiyo
dulli kaa fogeeyoo
adigiyo dadkaaguba
deegaan barwaaqiyo
lagu gaaro derejee
ka dadaal waxbarashada
markaagaad danjire
iyo daadaheeye noqonoo
dhisi degeladeenoo
daaraha bakiin iyo
waddooyin is dul mara iyo
dalsan aad ka yeeliye
damacaaga kor u qaad
wixi shalay dib kuu galay
dugsi maleh degmadayadu
danyar weeye reeruhu
diinaar ma bixin karo
dar xumooyinkii hore
waa laga dawooboo
diricyaasha nuur baa[waa noor foundation]
dacalkaaga joogoo
illaa aad digrii iyo
derejooyin gaadhay
damiin kaa ahaanine
dib ha eegin wixi hore
damiirkaagana u sheeg
inaad wiilal dooroo
dulli kaa ilaashoo
jahli kaala diriroo
kaa daalin leedahay
kaa daalin leedahay..
Tixdii: Ruqiyo Maxamed Subagdhame
